लोकन्यायालयात 10 कोटी 67 लक्ष तडजोड मुल्याची 3940 प्रकरणे निकाली…
पॉलिटिक्स स्पेशल लाईव्ह
यवतमाळ, दि. 28 सप्टेंबर :- यवतमाळ जिल्ह्यातील विविध न्यायालयात 25 सप्टेंबर रोजी आयोजित राष्ट्रीय लोक अदालतमध्ये 1483 प्रलंबित व 2457 वादपुर्व असे एकूण 3940 प्रकरणे आपसी तडजोडीने निकालात निघाली असून त्याचे तडजोड मुल्य रुपये 10 कोटी 67 लक्ष 53 हजार 879 आहे.
आपसी तडजोडीने वाद मिटविण्यासाठी यवतमाळ जिल्हा न्यायालय व सर्व तालुका न्यायालयांमध्ये दि. 25 सप्टेंबर रोजी राष्ट्रीय लोकअदालतीचे आयोजन करण्यात आले होते. यात न्यायालयात येण्याअगोदरीची प्रकरणे, विविध बँका, विमा कंपनी, विद्युत वितरण कंपनी, बीएसएनएल कंपनी, तसेच विविध पक्षकारांनी आपले वाद आपसी समझोत्याने निकाली काढण्यासाठी उत्स्फुर्तपणे भाग घेतला होता.
प्रमुख जिल्हा व सत्र न्यायाधीश तथा जिल्हा विधी सेवा प्राधिकरणचे अध्यक्ष वि.प्र.पाटकर यांच्या हस्ते लोकअदालतचे उद्घाटन करण्यात आले होते. यावेळी जिल्हा विधी सेवा प्राधिकरणचे सचिव न्या. एम.आर.ए. शेख, ॲड. जितेंद्र बारडकर प्रामुख्याने उपस्थित होते. तडजोडीने प्रकरण मिटवण्यासाठी जिल्ह्याच्या विविध न्यायालयातील न्यायीक अधिकारी, वकील, न्यायालयीन कर्मचारी, पक्षकार, जिल्हा व तालुका विधी सेवा पा्रधिकरणचे सदस्य तसेच भूअर्जन अधिकारी, बँकेचे अधिकारी, पोलीस अधिकारी व विभाग नियंत्रक यांनी सहकार्य केले.