राष्ट्रीय विषाणू संशोधन संस्थेला “सार्स कोव्हीड-2″लस साठी 30 माकडं द्या : वनमंत्री संजय राठोड

पॉलिटिक्स स्पेशल लाईव्ह
यू. एन.वानखेडे : ९६०४७५९७९७
विशेष प्रतिनिधी

राष्ट्रीय विषाणू संशोधन संस्था पुणेला “सार्स कोव्हीड-2′ ही लस विकसित करण्यासाठी 30 माकडांची गरज भासली आहे. ही माकडे आपल्या राज्याच्या वनांतून उपलब्ध करून द्यावी, असे निर्देश वनमंत्री संजय राठोड यांनी दिले आहेत. त्यानुसार 30 माकडं पुण्याला पाठविण्यात येणार आहेत.
कोरोना विषाणूमुळे “कोव्हीड-19’चा होत असलेला प्रादुर्भाव टाळण्यासाठी “सार्स कोव्हीड-2′ ही लस तत्काळ विकसित करण्यासाठी संशोधन हाती घेण्यात आले आहे. या संशोधन प्रकल्पासाठी पुण्याच्या राष्ट्रीय विषाणू संस्थेला 30 माकडांची गरज भासली आहे.

ही सर्व 30 माकडे महाराष्ट्र राज्याच्या हद्दीतील देण्यात येणार आहेत.कोरोना प्रतिबंधात्मक लसीचा सर्वप्रथम प्रयोग या माकडांवर करण्यात येणार आहे. सध्या राज्यात कोरोना विषाणुमुळे होत असलेला प्रादुर्भाव व परिस्थितीचे गांभीर्य लक्षात घेता या प्रकल्पास राज्याचे प्रधान मुख्य वनसंरक्षक (वन्यजीव) यांनी 30 मे 2020 रोजी तातडीने मान्यता देण्याची राज्य शासनाला शिफारस केली आहे.
त्यानुसार ही माकडे तत्काळ उपलब्ध करून देण्याबाबतचे निर्देश वनमंत्री संजय राठोड यांनी दिले.

याप्रकरणी अनुभवी मनुष्यबळामार्फत या माकडांना पकडणे, त्यांना कुशलतेने हाताळणे, त्यांना सुरक्षितपणे बाळगणे, पकडलेल्या माकडांना व परिसरातील इतर वन्यप्राण्यांना इजा होऊ न देणे, तसेच त्यांचा दैनंदिन जीवनक्रम विस्कळित न होऊ देणे, प्रकल्पाचा व्यापारी तत्त्वावर उपयोग न करणे, आदी अटी व शर्तींच्या अधीन राहून ही मान्यता देण्यात आलेली आहे.