“मातोश्री” बंगल्यात शिरला विषारी “नाग”

पॉलिटिक्स स्पेशल लाईव्ह
मुंबई :- माजी मुख्यमंत्री उद्धव ठाकरे यांच्या मातोश्री या निवासस्थानी कोब्रा या जातीचा नाग आढळला आहे. मातोश्री बंगल्यावरच्या कर्मचाऱ्यांना हा नाग दिसला. त्यामुळे त्यांनी सर्पमित्रांना बोलावलं आणि वन्यजीव संरक्षण तसंच रेस्क्यू टीमलाही पाचारण केलं.

सर्पमित्रांनी शिताफीने या नागाला पकडलं आणि जंगलात सोडलं. मातोश्री बंगल्यातल्या पाण्याच्या टाकीमागे हा नाग लपला होता.

रेस्क्यू टीमला ही माहिती जेव्हा मिळाली तेव्हा ते तिथे पोहचले. त्यांनी त्यांच्या नेहमीच्या पद्धतीने या नागाला पकडले आणि जंगलात सोडले. या संपूर्ण रेस्क्यू ऑपरेशनच्या दरम्यान तेजस ठाकरेही तिथे उपस्थित होते. त्याचप्रमाणे माजी मुख्यमंत्री उद्धव ठाकरेही उपस्थित होते. हा नाग पकडला गेल्यानंतर उद्धव ठाकरेंनी सर्पमित्रांचे आभार मानले आहेत. मातोश्री बंगल्यात नाग शिरल्याची बातमी उद्धव ठाकरेंना कळली तेव्हा ते तातडीने बाहेर आले. त्यांनी या नागाला जे रेस्क्यू करण्याची प्रक्रिया होती ती पाहिली. किंग कोब्रा या जातीचा हा नाग आहे. जवळपास चार फुटांचा हा नाग होता. हा विषारी जातीचा साप आहे.

संजय राऊत यांच्या भांडुपच्या निवासस्थानीही शिरला होता साप

काही दिवसांपूर्वीच ठाकरे गटाचे खासदार संजय राऊत यांच्या भांडुप येथील घरातही साप शिरल्याची बातमी समोर आली होती. खासदार संजय राऊत पत्रकार परिषद घेत होते. त्यावेळी हा साप तिथे निघाला. संजय राऊत यांच्या खुर्चीजवळच हा साप दिसला होता. पांदीवड नावाचा बिनविषारी जातीचा तो साप होता. त्यावेळीही सर्पमित्रांना बोलवून हा साप पकडण्यात आला. त्यानंतर आता उद्धव ठाकरेंच्या मातोश्री या निवासस्थानी किंग कोब्रा आल्याचं वृत्त समोर आलं आहे.

आशिष शेलार यांचीही प्रतिक्रिया

उद्धव ठाकरेंनी देवेंद्र फडणवीस यांच्यावर जी टीका केली त्या टीकेला आशिष शेलार यांनी जोरदार प्रत्युत्तर केलं. त्यानंतर त्यांना मातोश्रीवर साप आढळून आला त्याविषयी प्रतिक्रिया विचारली गेली. त्यावेळी आशिष शेलार म्हणाले, “कुठलाही मुंबईकर नागरिक तो कितीही विषारी बोलत असेल तरीही त्याच्या घरात साप सोडू नये. असे प्रकार होत असतील तर ते चुकीचे आहेत. मातोश्रीवर साप कसा आला? तो बाहेरून आला होता का? की तो नाग तिथेच राहात होता याची माहिती मुंबई महापालिकेने द्यावी.” असं आता शेलार यांनी म्हटलं आहे.