ममतांसह इतरांनी नव्याने याचिका करावी, विजयी मतांच्या फरकावरून सर्वोच्च न्यायालयाचा निर्वाळा….

पॉलिटिक्स स्पेशल लाईव्ह
नवी दिल्ली :- “पश्चिम बंगालमधील ज्या ३१ मतदारसंघांमध्ये विजयाचे अंतर हे मतदारसंघात मतदारयाद्यांच्या विशेष सखोल फेरतपासणीनंतर (एसआयआर) वगळण्यात आलेल्या मतांच्या संख्येपेक्षा कमी आहे, त्याबाबत ममता बॅनर्जी आणि इतर उमेदवार नव्याने याचिका दाखल करू शकतात, असे सर्वोच्च न्यायालयाने सोमवारी स्पष्ट केले.

सरन्यायाधीश न्या. सूर्य कांत आणि न्या. जॉयमाल्या बागची यांच्या खंडपीठासमोर या प्रकरणाची सुनावणी झाली. तृणमूल काँग्रेसचे खासदार कल्याण बॅनर्जी यांनी न्यायालयात दावा केला की, आमचा उमेदवार केवळ ८६२ मतांनी पराभूत झाला, मात्र त्याच मतदारसंघात एसआयआरमध्ये ५,५५० मते वगळण्यात आली होती. अशा प्रकारे राज्यातील ३१ जागांच्या निकालावर परिणाम झाला असावा, असा संशय त्यांनी व्यक्त केला.

निवडणूक आयोगाने याला विरोध केला असून, अशा तक्रारींसाठी निवडणूक याचिका हाच एकमेव कायदेशीर मार्ग असल्याचे म्हटले आहे. मात्र, न्यायालयाने स्पष्ट केले की या विशिष्ट मुद्द्यावर उमेदवार स्वतंत्र अर्ज करू शकतात. मतदारयाद्यांमधून नावे वगळलेल्यांनी लवादाकडे दाद मागितली आहे. मात्र, त्यासाठी चार वर्षांचा कालावधी घेतला जाईल, अशी भावना असल्याचे ज्येष्ठ वकील मनेका गुरुस्वामी यांनी नमूद केले.