विरोधी पक्षनेतेपदासाठी उद्धव ठाकरेंकडून अध्यक्षांकडे भास्कर जाधवांच्या नावाची शिफारस….

पॉलिटिक्स स्पेशल लाईव्ह
मुंबई :- “राज्याच्या राजकारणातून आत्ताची सर्वात मोठी मोठी बातमी समोर येत आहे. विरोधी पक्षनेतेपदी भास्कर जाधव यांची वर्णी लागली आहे. विरोधी पक्षनेतेपदासाठी उद्धव ठाकरेंकडून भास्कर जाधव यांचं नाव निश्चित करण्यात आलं आहे.

ठाकरे गटाचे प्रमुख उद्धव ठाकरे आणि शिष्टमंडळ विधानसभा अध्यक्षांची भेट घेण्यासाठी विधानभवनात दाखल झाले आहेत. शिवसेना ठाकरे गटाकडून विधानसभा अध्यक्षांकडे विरोधी पक्षनेतेपदासाठी भास्कर जाधव यांच्या नावाची शिफारस करण्यात आली आहे. तसेच पत्र देखील ठाकरे गटाकडून अध्यक्षांना देण्यात आले आहे.

या संदर्भात माध्यमांशी बोलताना उद्धव ठाकरे म्हणाले की, “आज शिवसेनेने विरोधीपक्षनेतेपदावर दावा केला आहे. महाविकास आघाडी म्हणून काँग्रेस असो किंवा राष्ट्रवादी काँग्रेस असेल आम्ही पुढील वाटचाल एकत्र करणार आहोत. विधानसभा अध्यक्षांकडे आम्ही आज भास्कर जाधव यांच्या नावाची शिफारस केली आहे. अर्थसंकल्पापूर्वी राज्यात विरोधीपक्षनेता असला पाहिजे असे आमचे मत आहे.” अडीच अडीच वर्षांच्या फॉर्म्युल्याच्या चर्चेवर बोलताना उद्धव ठाकरे म्हणाले की, “असा काही फॉर्म्युला नाही, आम्ही एकत्रितपणे पुढे जात आहोत. राज्यात आगामी काळात निवडणुका होणार आहेत, तेव्हा काय असेल ते पाहू.”

यावेळी धनंजय मुंडे यांच्या राजीनाम्यावर देखील उद्धव ठाकरे यांनी प्रतिक्रिया दिली. ते म्हणाले की, “संतोष देशमुख यांच्या हत्येचे फोटो जे काल समोर आले, ते सरकारकडे आधी आले होते का? यासंदर्भात भरपूर चर्चा झाली आहे. धनंजय मुंडेंच्या राजीनाम्याचा आजचा पहिला दिवस झाला आहे. मुख्यमंत्री पारदर्शकपणे काम करत असतील तर त्यांचं स्वागत आहे, पण पारदर्शकपणे काम करताना मुख्यमंत्र्यांचे हात कोणी बांधून ठेवत आहे का? हा एक प्रश्न आहे. महाराष्ट्राच्या जनतेला आता या सगळ्याच विट आला आहे. आता जनतेला त्यांच्या व्यथा सोडवणारं सरकार हवं आहे.”

पुढे बोलताना ठाकरे म्हणाले की, डिसेंबरपासून हे प्रकरण गाजत आहे. पण या सर्व गोष्टी अधिवेशन काळातच का बाहेर आल्या? हा प्रश्न आहे. धनंजय मुंडे म्हणतात की प्रकृती अस्वास्थ्यामुळे दिला आणि अजित दादा म्हणतात की नैतिकतेच्या आधारावर दिला, तर राजीनामा नेमक्या कोणत्या कारणाने देण्यात आला असा सवाल ठाकरेंनी उपस्थित केला. राजीनामा आता झाला आहे, परंतु तो कोणत्या कारणाने झाला याचं उत्तर दिलं गेलं पाहिजे, असेही ते म्हणाले.