फसवणूक प्रकरणी बाबा रामदेव, आचार्य बाळकृष्ण यांना समन्स ; न्यायालयात हजर राहण्याचे आदेश….
पॉलिटिक्स स्पेशल लाईव्ह
बेगुसराय :- न्यायालयानं बाबा रामदेव आणि बालकृष्ण यांना 12 जानेवारीपर्यंत न्यायालयात हजर राहण्याचे आदेश दिले आहेत.
बिहारमध्ये योगगुरू बाबा रामदेव आणि त्यांचे सहकारी आचार्य बाळकृष्ण यांच्या विरोधात फसवणूक प्रकरणी समन्स जारी करण्यात आलं आहे.
बेगुसराय जिल्हा न्यायालयाच्या न्यायदंडाधिकारी मोहिनी कुमारी यांनी निंगा गावातील रहिवासी तक्रारदार महेंद्र शर्मा यांनी दाखल केलेल्या तक्रार पत्रावर सुनावणी करताना योगगुरू बाबा रामदेव आणि बाळकृष्ण यांना कलम 420 आणि 417 अंतर्गत समन्स बजावण्याचे आदेश दिले.
मिळालेल्या माहितीनुसार, न्यायालयानं बाबा रामदेव आणि बालकृष्ण यांना 12 जानेवारीपर्यंत न्यायालयात हजर राहण्याचे आदेश दिले आहेत. खरं तर, 18 जून 2022 रोजी बरौनी पोलीस स्टेशन परिसरातील निंगा गावामधील रहिवासी महेंद्र शर्मा यांनी बाबा रामदेव आणि बाळकृष्ण यांच्याविरोधात सीजीएम कोर्टात तक्रार दाखल केली होती. याप्रकरणी पैसे घेऊनही उपचार केले जात नसल्याचा आरोप तक्रारदारानं केला होता.
जाणून घ्या काय आहे संपूर्ण प्रकरण
फिर्यादी महेंद्र शर्मा यांनी योगगुरू बाबा रामदेव आणि बालकृष्ण यांच्यावर आरोप केलाय की, आम्ही उपचारासाठी पतंजली आयुर्वेद प्रायव्हेट लिमिटेड (Patanjali Ayurveda Private Limited) महर्षी कॉटेज योग ग्राम झुलामध्ये एकूण 90,000 रुपये जमा केले होते. माझा मुलगा नरेंद्र कुमार याच्या बँक खात्यातून पैसे ट्रान्सफर केले होते. पैसे जमा केल्यानंतर मी, माझा मुलगा आणि पत्नी पतंजलीनं दिलेल्या तारखेनुसार आणि वेळेत उपचार करण्यासाठी तिथं गेलो. परंतु, तिथं आम्हाला तुमचे पैसे जमा झाले नसल्याचं सांगण्यात आलं. दरम्यान, साक्षीदारांनी दिलेल्या जबाबानंतर न्यायालयानं योगगुरू बाबा रामदेव आणि बालकृष्ण यांच्या विरोधात पुराव्याची दखल घेत दोन्ही आरोपींना 12 जानेवारी 2023 पर्यंत न्यायालयात हजर राहण्याची नोटीस बजावली आहे.