रेल्वे तिकिटांचा काळाबाजार, ११ जणांना अटक

विदर्भ वतन न्युज पोर्टल, नागपूर 

नागपूर – रेल्वे तिकिटांचा काळाबाजार रोखण्यासाठी आरपीएफने दोन दिवस राबविलेल्या मोहिमेत १२ प्रकरणांची नोंद करून ११ जणांना अटक करण्यात आली. दोन दिवसांत दक्षिण पूर्व मध्य रेल्वेच्या नागपूर विभागात ८० ठिकाणी छापे टाकण्यात आलेत. या कारवाईने रेल्वे तिकीट दलालांमध्ये खळबळ उडाली आहे.

एएनएमएस आणि रेड मिर्ची या नावाने आयआरसीटीसीच्या समांतर वेबसाइट तयार करून रेल्वे तिकिटांचा (ऑनलाइन) काळाबाजार करणारे सक्रिय आहेत. या प्रकरणात देशभरातील आयआरसीटीसीचे अधिकृत एजंट सहभागी आहेत का, याची तपासणी करण्यासाठी आरपीएफतर्फे देशभरात शोध मोहीम राबविण्यात येत आहे. त्यात दोन दिवस दक्षिण पूर्व मध्य रेल्वेच्या नागपूर विभागात छापे घालण्यात आलेत. नागपूर विभागात ज्यांना अटक झाली ते सर्व आयआरसीटीसीचे अधिकृत एजंट आहेत. त्यांच्याकडे आयआरसीटीसीचे ओळखपत्र आहे. या ओळखपत्रावरच त्यांनी ऑनलाइन रेल्वे तिकीट प्रवाशांना उपलब्ध करून द्यावे, असा नियम आहे. मात्र यातील ११ एजंट बनावट आयडी तयार करून किंवा प्रवाशांच्या स्वतंत्र आयडीवर ऑनलाइन तिकीट उपलब्ध करून देत होते.

तिकीट उपलब्ध करून देण्यासाठी प्रवाशांकडून २०० ते ५०० रुपये (प्रति तिकीट) घेतले जाते, असे तपासात आढळून आले. त्या ११ एजंटवर गुन्हे दाखल करून त्यांना अटक करण्यात आली. मो. मुस्तफा शेख मेहबूब (उप्पलवाडी), गौरव कवतिया (नंदनवन), चेतन गिèऱ्हेपुंजे (भंडारा), नरेशकुमार लघानी, अफाक खान, मनोज अलोणे, गणेश सूर्यवंशी, मयूर गजभिये (सर्व छिंदवाडा ), संजय प्रतापसिंह (शिवनी), अक्षय कुमार (मंडला) आणि किशोर कुमार (राजनांदगाव) ही अटकेतील एजंटची नावे आहेत. त्यांच्या ताब्यातून १ लाख ५० हजार ३६४ रुपये किमतीची १०१ ऑनलाइन रेल्वे तिकिटे जप्त करण्यात आली.

दक्षिण पूर्व मध्य रेल्वेचे विभागीय सुरक्षा आयुक्त आशुतोष पांडेय यांच्या मार्गदर्शनात दोन दिवस राबविलेल्या मोहिमेत आरपीएफ निरीक्षक अनिल पाटील, एच. आर. यादव, राजीव कुमार, विकास कुमार, एस. दत्ता, उपनिरीक्षक सी. के. पी. टेभुर्णीकर, पी. एल. जुमडे, उषा बिसेन, मो. मुगीशुद्दीन, सहाय्यक उपनिरिक्षक एम. बी. साहु यांचा सहभाग होता.