काँग्रेसच्या राष्ट्रीय अधिवेशनाच्या समितीत बाळासाहेब थोरातांचा समावेश नाही, नाना पटोलेंना मात्र संधी….

पॉलिटिक्स स्पेशल लाईव्ह
मुंबई :- विधान परिषद निवडणुकीच्या निमित्ताने महाराष्ट्र काँग्रेसमधील अंतर्गत वाद चव्हाटय़ावर आला आहे. हा वाद मिटवण्याचे प्रयत्न सुरू आहेत. पण रायपूरमधील काँग्रेसच्या राष्ट्रीय अधिवेशनासाठी स्थापन करण्यात आलेल्या समित्यांमध्ये पक्षाचे ज्येष्ठ नेते बाळासाहेब थोरात यांना स्थान देण्यात आलेले नाही, मात्र दुसरीकडे नाना पटोले यांचा समितीमध्ये समावेश करण्यात आलेला आहे.
अखिल भारतीय काँग्रेस समितीचे राष्ट्रीय अधिवेशन येत्या 24 ते 26 फेब्रुवारी या काळात होणार आहे. या अधिवेशनासाठी काँग्रेस अध्यक्ष मल्लिकार्जुन खरगे यांनी विविध समित्या स्थापन केल्या असून त्याची घोषणा काँग्रेसचे राष्ट्रीय महासचिव के. सी. वेणुगोपाल यांनी नुकतीच केली. या समित्यांमध्ये महाराष्ट्रातील अनेक दिग्गज नेत्यांचा समावेश करण्यात आला आहे.

के. सी. वेणुगोपाल यांनी जाहीर केल्यानुसार अशोक चव्हाण यांच्या समवेत खासदार मुकुल वासनिक आणि माजी मुख्यमंत्री पृथ्वीराज चव्हाणदेखील मसुदा समितीचे सदस्य असतील. मुकुल वासनिक यांच्याकडे सामाजिक न्याय व सक्षमीकरण उपसमितीचे अध्यक्षपदही देण्यात आले आहे. डॉ. मनमोहन सिंग सरकारमध्ये त्यांनी पेंद्रामध्ये याच विभागाचे मंत्रीपद सांभाळले होते, तर अशोक चव्हाण निमंत्रक असलेल्या राजकीय व्यवहार उपसमितीमध्ये महाराष्ट्रातून माजी मंत्री नसीम खान व आमदार यशोमती ठाकूर यांचा सदस्य म्हणून समावेश आहे. आर्थिक व्यवहार उपसमितीमध्ये माजी पेंद्रीय मंत्री मिलिंद देवरा, आमदार प्रणिती शिंदे व माजी मंत्री आमदार नितीन राऊत यांना सदस्य म्हणून समाविष्ट करण्यात आले आहे. तर महाराष्ट्राचे प्रदेशाध्यक्ष नाना पटोले यांना शेतकरी व कृषी उपसमितीचे सदस्य म्हणून काम करण्याची संधी मिळाली आहे. तर मुकुल वासनिक अध्यक्ष असलेल्या सामाजिक न्याय आणि सक्षमीकरण उपसमितीमध्ये माजी मंत्री शिवाजीराव मोघे व आमदार विजय वडेट्टीवार हे सदस्य असतील. युवक, शिक्षण व रोजगार उपसमितीमध्ये माजी मंत्री, आमदार वर्षा गायकवाड यांना सदस्य करण्यात आले आहे. पण विधिमंडळातील नेतेपदाचा राजीनामा देणारे महाराष्ट्र काँग्रेसचे ज्येष्ठ नेते बाळासाहेब थोरात यांना या समित्यांमध्ये स्थान देण्यात आले नसल्याने नव्या राजकीय चर्चेला सुरुवात झाली आहे.