महिलांबाबतचे आक्षेपार्ह विधान कृषिमंत्री अब्दुल सत्तारांना भोवणार, कारवाईसाठी राज्यपालांचे मुख्यमंत्र्यांना पत्र…..

पॉलिटिक्स स्पेशल लाईव्ह
मुंबई :- कृषिमंत्री अब्दुल सत्तार यांनी काही दिवसांपूर्वी राष्ट्रवादी कॉँग्रेसच्या खासदार सुप्रिया सुळे यांच्याबद्दल अत्यंत आक्षेपार्ह विधान केले होते. सत्तारांच्या कृतीमुळे राज्यभरात संताप व्यक्त करण्यात आला होता.
यासंदर्भात सर्वपक्षीय महिला आमदार व खासदारांच्या शिष्टमंडळाने दिलेल्या निवेदनाची दखल घेत राज्यपाल भगतसिंग कोश्यारी यांनी ते पुढील कारवाईसाठी मुख्यमंत्री एकनाथ शिंदे यांच्याकडे पाठविले आहे. त्यामुळे हे प्रकरण सत्तार यांना भोवण्याची शक्यता आहे.

संभाजीनगरमधील सिल्लोड येथे झालेल्या एका जाहीर सभेत मंत्री अब्दुल सत्तार यांनी खासदार सुप्रिया सुळे यांच्यावर अत्यंत आक्षेपार्ह शब्दांत टीका करत शिवीगाळ केली होती. मंत्रीपदी असताना एका महिला नेत्याला शिवीगाळ करणाऱ्यां सत्तार यांची मंत्रीपदावरून हकालपट्टी करण्यात यावी, अशी मागणी करत राष्ट्रवादी काँग्रेसच्या कार्यकर्त्यांनी ठिकठिकाणी आंदोलन केले होते. दरम्यान, महाविकास आघाडीच्या महिला नेत्यांनी राज्यपाल कोश्यारी यांना एक निवेदन सादर करत कारवाईची मागणी केली होती. याची दखल राज्यपालांनी घेतली असून उचित कार्यवाहीसाठी ते मुख्यमंत्र्यांना पाठविण्यात आल्याची माहिती राष्ट्रवादी कॉँग्रेसच्या नेत्या खासदार फौजिया खान यांनी ट्विट करत दिली आहे.