ठाकरे गटाकडून लोकसभेची तयारी, नाशिकमध्ये महा अधिवेशनाचे आयोजन….
पॉलिटिक्स स्पेशल लाईव्ह
मुंबई :- आगामी काळातील निवडणुकीच्या पार्श्वभूमीवर ठाकरेंच्या शिवसेना गटाचे महा अधिवेशन 23 जानेवरीला नाशिकमध्ये आयोजित करण्यात आले आहे. या अधिवेशनात राज्यभरातून असंख्य पदाधिकारी उपस्थित राहणार असून यात लोकसभा निवडणूकीची रणनीती आखली जाणार आहे.
याच पार्श्वभूमीवर आज खासदार संजय राऊत यांनी अधिवेशन तयारीचा आढावा घेतला. यावेळी त्यांनी अधिवेशन तयारी संबंधी आवश्यक त्या सूचना आयोजकांना केल्या. पाहणीवेळी राऊत यांच्यासोबत ठाकरे गटाचे स्थानिक पदाधिकारी उपस्थित आहे. दरम्यान, महा अधिवेशनच्या परिसरात मोठ्या प्रमाणात फलकबाजी करण्यात आल्याने विरोधक आणि सत्ताधारी यांच्यात बॅनरवॉर पहायला मिळण्याची शक्यता आहे.
शिवसेना ठाकरे गटाचे पक्षप्रमुख उद्धव ठाकरे 22 व 23 जानेवरीला नाशिक दौऱ्यावर आहेत. या दरम्यान उध्दव ठाकरे भगूर येथील स्वातंत्र्यवीर सावरकर स्मारक, काळाराम मंदिर आदी ठिकाणांना भेटी देणार आहेत. हॉटेल डेमोक्रसी येथे राज्यव्यापी अधिवेशन होणार आहे.
तसेच नाशिकच्या अनंत कान्हेरे मैदानावर ठाकरे गटाची जाहीर सभा होणार आहे. या सभेला राज्यभरातून 1700 हून अधिक पदाधिकारी उपस्थित राहणार आहेत. या अधिवेशनादरम्यान आगामी लोकसभा निवडणुकीची रणनीती आखली जाणार आहे. तसचे निवडणुकीचे रणशिंग फुंकले जाण्याची शक्यता असल्याने ठाकरे गटाचे हे महा अधिवेशन महत्वाचे मानले जात आहे.
असा असेल ठाकरेंचा दौरा
उद्यापासून म्हणजेच दोन दिवस उद्धव ठाकरे नाशिक दौऱ्यावर आहेत. 22 जानेवारीला उद्धव ठाकरे विमानामार्गे दुपारी नाशिकच्या दिशेने रवाना होणार आहेत. दुपारी 4 वाजता ते नाशिकमधील भगुर येथील विर सावरकर स्मारकाला भेट देऊन अभिवादन करणार आहेत. 5 वाजता काळाराम मंदिराचे दर्शन घेऊन गोदेच्या आरती समारंभाला उपस्थित राहणार आहेत.
23 जानेवारीला उद्धव ठाकरे सकाळी डेमोक्रेसी हॉटेल येथे आयोजित राज्यव्यापी महा अधिवेशनाला उपस्थित राहणार आहेत. यावेळी आगामी लोकसभेची रणनीती आखली जाणार आहे. त्यानंतर संध्याकाळी 7 वाजता अनंत कान्हेरे मैदानावर शिवसेनेची जाहीर सभा होणार आहे. तेथे उद्धव ठाकरे उपस्थित राहणार आहेत. या सभेला राज्यभरातून 1700 हून अधिक पदाधिकारी उपस्थित राहणार आहेत.