तानाजी सावंत यांची मंत्रिमंडळातून हकालपट्टी करा, नाना पटोले यांची सरकारकडे मागणी….

पॉलिटिक्स स्पेशल लाईव्ह
मुंबई :- मराठा समाजाला आरक्षण मिळण्यासाठी मराठा संघटना पुन्हा एकदा आक्रमक झाल्या आहेत. नुकतेच सकल मराठा समाज आणि मराठा क्रांती मोर्चाच्या वतीने राज्यात काही ठिकाणी निदर्शने करण्यात आली.
मराठ्यांच्या आरक्षणासाठी सर्व संघटना प्रयत्न करत असताना शिंदे-फडणवीस सरकारमधील आरोग्यमंत्री तानाजी सावंत यांनी ‘मराठ्यांना आरक्षणाची खाज सुटली आहे’, असे संतापजनक वक्तव्य केले आहे.

मात्र तानाजी सावंत यांचे हे वक्तव्य मराठा समाजाची बदनामी करणारे व त्यांचा अपमान करणारे असून मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी सावंत यांच्या विधानावर खुलासा करावा व बेताल वक्तव्य करणाऱ्या तानाजी सावंत यांची मंत्रीमंडळातून तात्काळ हकालपट्टी करावी, अशी मागणी महाराष्ट्र प्रदेश कॉंग्रेसचे अध्यक्ष नाना पटोले यांनी केली आहे.

आरोग्यमंत्री तानाजी सावंत यांच्या बेताल वक्तव्याचा निषेध करताना नाना पटोले म्हणाले की, मराठा आरक्षणाची मागणी मागील अनेक वर्षांपासून होत आहे. मराठा समाजाला आरक्षण मिळावे यासाठी राज्यातून विविध संघटना व राजकीय पक्षांचे प्रयत्न सुरु आहेत. सरकारी पातळीवर व न्यायालयीन पातळीवरही हा लढा सुरु आहे. महाविकास आघाडी सरकारने मराठा समाजाला आरक्षण मिळावे यासाठी प्रयत्न केले होते.