बीडसाठी सोनियाचा दिवस..! मुंडे बहीण-भाऊ पहिल्यांदाच मंत्रिमंडळात एकत्र….

पॉलिटिक्स स्पेशल लाईव्ह
नागपूर :- “महाराष्ट्राची उपराजधानी नागपूरमध्ये आज महायुती सरकारचा मंत्रीमंडळ विस्तार कार्यक्रम पार पडला. फडणवीस सरकारच्या या मंत्रिमंडळ विस्तारात 39 आमदारांनी मंत्रिपदाची शपथ घेतली.

राज्यपाल सी पी राधाकृष्णन यांनी त्यांना पद आणि गोपनीयतेची शपथ दिली. यामध्ये भाजपकडून 19, शिवसेनेकडून 11 आणि राष्ट्रवादीकडून 9 आमदारांनी मंत्रिपदाची शपथ घेतली. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांनी आधीच शपथ घेतलेली आहे. त्यामुळे महायुती सरकारमध्ये आतापर्यंत 42 मंत्र्यांचा शपथविधी पार पडला आहे.

मंत्रिमंडळात मुंडे बहीण-भाऊ एकत्र दिसणार

मुख्यमंत्री देवेंद्र फडणवीस यांच्या या मंत्रिमंडळात पहिल्यांदाच बाहीण-भाऊ एकत्र दिसणार आहेत. बीडमधून मुंडे (Pankaja Munde) आणि धनंजय मुंडे या बहीण भावांनी आज झालेल्या महायुती सरकारच्या मंत्रिमंडळ विस्तारात मंत्रिपदाची शपथ घेतली. यामुळे बीडमध्ये मोठा जनाधार असलेल्या मुंडे घराण्यात पहिल्यांदाच दोन मंत्रिपदे मिळाली आहे. पंकजा मुंडे या विधान परिषदेवर निवडून गेल्या असून त्यांना भाजपने मंत्रिपदाची संधी दिली आहे, तर धनंजय मुंडे यांना राष्ट्रवादी काँग्रेसच्या खात्यातून मंत्रिपद मिळाले आहे. या शपथविधी सोहळ्यात पंकजा मुंडे यांनी शपथ घेताच समोर बसलेल्या कार्यकर्त्यांनी गोपीनाथ मुंडे यांच्या नावाचा जयघोष केला.

पंकजा मुंडेंनी केला धनंजय मुंडेचा प्रचार

गोपीनाथ मुंडे यांचे निधन झाल्यानंतर 2019 च्या विधानसभा निवडणुकीत पंकजा मुंडे आणि धनंजय मुंडे आमने सामने आले होते. तेव्हा धनंजय मुंडे यांनी पंकजा मुंडे यांचा पराभव केला होता. या निवडणुकीत दोन्ही बहीण भावाकडून एकमेंकावर जोरदार टीका कऱण्यात आली होती. यामुळे बीडच्या राजकारणात गोपीनाथ मुंडे यांच्या समर्थकांमध्ये दोन गट पडले होते. परंतु 2024 च्या विधानसभा निवडणुकीत पुन्हा एकदा हे सर्व मुंडे समर्थक एकत्र आलेले दिले. पंकजा मुंडे यांनी धनंजय मुंडे यांचा उमेदवारी अर्ज भरण्यापासून ते प्रचाराच्या शेवटच्या दिवसापर्यंत प्रचार केला. दोन्ही बहीण भाऊ एकत्र आल्याने मुंडे समर्थकांमध्ये आनंद होता. आता हे दोन्ही बहीण-भाऊ मंत्रिमंडळात देखील एकत्र दिसणार आहे.

मस्साजोग प्रकरणामुळे बीडचं राजकारण तापलं

मस्साजोग येथील सरपंच संतोष देशमुख यांच्या हत्येमुळे बीड जिल्ह्यातील राजकीय वातावरण तापलेले आहे. या प्रकरणात राष्ट्रवादीच्या पदाधिकाऱ्यांची नावे समोर आली असून पोलिसांनी तिघांना अटक केली आहे. तसेच या प्रकरणातील तीन आरोपी अजूनही फरार आहेत. यात धनंजय मुंडे यांचे जवळचे सहकारी वाल्मिक कराड यांच्यावर देखील गंभीर आरोप आहेत. अशा परिस्थितीत आता बीडला नवा पालकमंत्री मिळणार आहे. त्यामुळे मस्साजोग येथील सरपंच संतोष देशमुख याच्या हत्येचा तपास वेगाने होईल आणि त्यांना न्याय मिळेल अशी अपेक्षा जिल्ह्यातील सर्वसामान्य नागरिकांना आहे.