देशाभरातील पोटनिवडणुकांमध्ये भाजपचा झेंडा ; काँग्रेसच्या पदरी पुन्हा निराशा….

पॉलिटिक्स स्पेशल लाईव्ह
नवी दिल्ली :- सहा राज्यांमधील विधानसभेच्या पोटनिवडणुकांचे 7 जागांचे निकाल आज जाहीर झाले. त्यातच भाजपसाठी आनंदाची बातमी समोर आली आहे. या सातपैकी तीन जागांवर भाजपने दणदणीत विजय नोंदवला आहे.
याशिवाय शिवसेनेने एका जागेवर तर राजदने एका जागेवर विजय मिळवला आहे.

मात्र या सगळ्यात सर्वात मोठा झटका अद्यापही मैदानात न उतरलेल्या काँग्रेसला बसला आहे. दरम्यान, नुकतेच काँग्रेसचे नवे राष्ट्रीय अध्यक्ष मल्लिकार्जुन खर्गे यांनी काँग्रेसची जबाबदारी स्वीकारली असली तरी, त्यांच्या आगमनानंतर आता विधानसभेच्या 7 जागांसाठी झालेल्या पोटनिवडणुकीत पक्षाला पहिला मोठा धक्का बसला आहे.
पक्षाला एकही जागा जिंकता आली नाही. एवढेच नाही तर आदमपूरची (हरियाणातील आदमपूर) पारंपरिक जागाही भाजपने जिंकली आहे, तर काँग्रेसचे कुलदीप बिश्नोई अनेकवेळा येथून आमदार राहिले आहेत. कुलदीप बिश्नोई यांनी नुकतेच काँग्रेस सोडून भाजपमध्ये प्रवेश केला असून त्यांच्या मुलाला या जागेवरून तिकीट मिळाले असून ते विजयी झाले आहेत.